Люду і краю
Над табою, край пакуты,
Сонца выплывае:
Спатыкнуўся Гітлер люты,
Язва маравая!
Пад ударам маладзецкім
Арміі Чырвонай
Захлынуўся пых нямецкі
Чорнага барона.
Не было ж такога звера,
Як ён, клешч паганы.
Дык адплацім поўнай мерай
За ўсе болі, раны.
Адпаўзае гад са скрыпам
У смяртэльнай злобе,
Ды не так яшчэ насыпем
Язве той, хваробе!
Прыгадаем слёзы, здзекі
Тупарылай мопсе
Так, каб немец на век-векі
Меч падняць зарокся.
Не давайце ж перадышкі
Гітлераўскай зграі!
Няхай спусціць дух і кішкі
Тут, у нашым краі.
Люд мой, край доўгацярпення!
Блізка наша свята:
З-пад Дняпра, Дзвіны збавенне
Ідзе к нам у хату.
Дапаможам на ўсю сілу
Арміі герояў —
Скоцім ідала ў магілу
І майстроў разбоя.
30/ХІ 1943