Фашысцкім бандытам

Якуб Колас

Запамятай цвёрда,
Разбойнік з Берліна,
Сусветны грабежнік, бандыт:
Ты сам, твае орды
Ў Савецкай краіне
Жалезны свой зломяць капыт.
 
Няхай варʼяцее
Цямраная сіла,
На далечы сцеле туман, —
        Фашысцкаму змею
Тут будзе магіла —
Пад горкай асінай курган.
 
Зямля, мая маці,
Радзіма мая ты!
Гарой пастаім за цябе.
Варожыя раці
Вампіраў заклятых
Змяцём у святой барацьбе.
 
Разгорнем шырока
        Магутныя плечы
І вышай падымем наш сцяг,
Бо час недалёка
Рашучае сечы,
І зрынецца вораг у прах.
 
Дык помні ж ты цвёрда,
Разбойнік з Берліна,
        Крывавае цьмы пасланец:
Ты сам, твае орды
У нашай айчыне
                Ганебны свой знойдуць канец!
 
Шчыльней жа зʼяднаем
Рады баявыя,
На ворага рушым, як вір.
Лунаюць над краем
Сцягі агнявыя, —
Вядзі нас на бой, правадыр!



 
Ліпень 1941