Савецкай Арміі

Якуб Колас

На свеце спакою няма:
Выпоўзае гад з небаскроба
І сыкае спрут цвёрдалобы,
Апостал крыві і ярма.
 
Падпальшчыкі новай вайны,
Злавесныя цені-пачвары,
Употай рыхтуюць пажары,
Народам куюць кайданы.
 
Не міл ім савецкі размах,
          Што гніль іх старую змятае,
Ды ўсё ж наша праўда святая
Узніме над светам свой сцяг.
 
Замах жа іх марны, пусты:
Прад цёмнаю сілаю злою
Стаіш непарушнай скалою,
Савецкая Армія, ты!
 
Ад сэрца ўсяго, ад душы
Вітаю цябе з Новым годам!
На шчасце, на радасць народам
        Ахоўвай жа іх рубяжы.



 
19/ХІІ 1948