Балада пра начлег

Аляксей Пысін

Нядоўгі прывал. Нядоўгі начлег.
Пад намі снег, над намі снег.
 
Вароты рыпяць ці нашы сляды?
Дарога адна, дарога туды,
 
Дзе будзем анучы ў цяпле сушыць,
Да раніцы спаць, да старасці жыць.
 
Налева зіма, направа зіма,
Ні печы няма, ні дома няма.
 
Граната ў руках. Патрон у ствале.
Чаго нам, сябры, яшчэ не стае?
 
Стралковая рота сопку ўзяла.
...Пад намі зямля, над намі зямля.
 
1967