Санет ("Паміж пяскоў Егіпецкай зямлі...")

Максім Багдановіч

Ахвярую А. Погодіну



 


Un sonnet sans défaut
vaut seul un long poème.
Boileau*



 


Беззаганны санэт
варты адзін цэлае паэмы.
Буало (фр.)



 
Паміж пяскоў Эгіпецкай зямлі,
Над хвалямі сінеючаго Ніла,
Ўжо колькі тысяч год стаіць магіла:
Ў гаршчку насеньня жменю там знайшлі.
 
Хоць зернейкі засохшымі былі,
Усё ж такі жыцьцёвая іх сіла
Збудзілася і буйна ўскаласіла
Парой вясеньняй збожжа на ральлі.
 
Вось сымбаль твой, забыты краю родны!
Зварушаны нарэшце дух народны,
Я верую, бясплодна не засьне,
 
А ўперад рынецца, маўляў крыніца,
Каторая магутна, гучна мкне,
Здалеўшы з глебы на прастор прабіцца.